Siguro nga na natural sa karamihan sa mga bata ang pagkamakasarili. Dahil ba sa mura pa nilang isipan para may puwang naman ang maturity? Minsan, sa pagka-bad trip ko nang nadatnan kong makalat ang loob ng silid-aralan, ako na mismo ang nagwalis at nagtapon ng basura. Hindi na ako nag-utos sa kanila o sa cleaners ng araw na iyon upang subukan ko kung may kusang-loob ba sila o sense of responsibility na kahit na hindi na sila pagsabihan ay gagawin na nila nang maluwag sa loob ang kanilang mga tungkulin bilang mga mag-aaral. Hay, wala. Wala lang sa kanila kahit na nakatanga na sa panonood sa akin na naglilinis ng mga kalat nila o di kaya'y bubulyawan na lamang ang mga cleaners na tulungan ako pero mga mas walang kusang-loob din. Kinokontrol ko na lang nga ang pagkabwisit ko habang pinaaalalahanan sila ng tungkol sa kahit simpleng disiplina. Ngunit ewan ko nga ba sa ibang bata na may pagka-sadista na kapag lalong pinangangaralan ay mas lalong susuway. Siguro nga na mga paslit lang ang mga iyon. Mga batang musmos at hindi mga labinlimang taon gulang. Isipin ko na lang na may tamang panahon naman para sa lubos nilang pagkatuto at maturity. Gawin ko na lang ang aking mga tungkulin at hindi ako isang perfectly magical mentor na kaya silang baguhin overnight. Huwag pilitin. Ang cliche na paulit-ulit sa elementary school environment- mga bata pa naman yan, eh, marami pang kakaining bigas, ang aking mantra... period. Hindi ko naman sa nilalahat ang mga batang ito. Palibhasa ay iba ang nakagisnan kong 'kultura' noong ako'y nasa elementarya pa tulad nila.
Naiisip ko naman palagi ang mga batang iyon. Sino ba ako sa kanila? Kung sasagi man sa kanilang alaala ang pagmumukha ko, paano nila gugunitain ang nagdaang limang buwan (noong Disyembre lamang ako nagsimula dito sa VABES) nang nagku-krus ang aming mga landas tuwing umaga, Lunes hanggang Biyernes? Pagkatapos ng ilang taon kung kailan mas malalaki na sila kaysa sa akin at nag-flashback sa kanilang alaala ang panahong greyd por pa sila, maaalala pa kaya nila ang weirdong ito na nag-substitute sa kanilang yumaong class adviser? Ang kanilang pangalawang class adviser na isang total stranger na dumaan lang sa panahon ng kanilang kabataan at minsan ay kanilang nakadaupang-palad?
"Teach a child to choose the right path; and when he becomes older, he will remain upon it" Proverbs 22:6 - ang kawikaang naging bahagi na ng aking kamalayan mula pa noong ten years old ako; assignment kasi namin ang mag-recite ng isang salawikain sa Character Education subject at nang binuklat ko ang Bibliya, nadama ko ang inspirasyon ng Holy Spirit at napili ko ito sa dinami-dami ng mga passages doon.
